Leitlun thuanthu le kum siar tikah BC le AD (B.C. le A.D.) tin hman a si.

BC cu Mirang ttong in (Before Christ, Jesuh Suahhlan)  ti a siih AD ve thung cu Latin ttong in (Anno Domini, The Year of the Lord) ti a si. (Latin ttong cu hlanlai Italian ttong a si.)

Adam le Eve Eden hmuan in dawisuak an si hnu in milai thuanthu cu BC 4000 in siar thok a rak si. BC cu a tamlam in a ttum vivo ih AD cu a mallam in a kai vivo. Tahthimnakah: Adam san BC 4000 ihsin a tum vivo ih BC 4 hrawng ah Jesuh a suak. Jesuh suah hnu in a kai vivo ih tuni cu AD 2000 leng a thleng.

 

1. Baibal sungih 'A hmaisabik' timi pa hnih (Seemtirnak 1:1, Johan 1:1)

 

Baibal sungah 'a hmaisabik' timi pahnih a um.

1) A hmaisabik ah Pathian in lei le van tla a seemsuah. (Seem 1:1)

2) A hmaisabik (a hramthok) ah Thu a rak um. Cuih Thu cu Pathian thawn a um ih Pathian a si. (Johan 1:1)

 

Johan 1:1 ih simmi 'a hmaisabik' hi Seemtirnak 1:1 ih simmi 'a hmaisabik' hnak ih hlanpi sawn a si.

Johan 1:1 ih a sim mi Thu (Fapa Pathian) cu a hramthok in a rak um zo. Anih cu thok ni nei lo Pathian a si.

Cumi Fapa Pathian cun a hmaisabik (Seem 1:1) ah lei le van tla a seemsuah.

 

2. Lucifer cu van in thlaak a si (Ezekiel 28, Isaiah 14)

 

Pathian nih lei le van a seemsuah hnu ah Lucifer cu van ihsin thlaak a si.

Lucifer cu vancungmi lakih sangbik a rak si. Pathian a dodal hnu ah van in thlaak a siih Satan tiah kawh a si. Adam le Eve sersiam an si hlan ah Satan cu a rak um zo.

 

3. Eden Hmuan (Seemtirnak 2)

 

Eden hmuan cu a tuni ih Iraq ram ah a rak um tiah zum a si. Ziangahtile Eden ihsin a luangmi a palitnak tiva Eufrates cu Iraq ram ah a um (Seem 2:14). Hmuan sungah rah ttha a rahmi le a mawi zetzetmi thingkung a phunphun a rak um. A famkim zet mi hmun a rak si.

 

4. Adam ihsin Noah tiang milai kum (Seemtirnak 5)

 

Adam le Eve cu Eden hmuan sung an um lai ah minung kum (age) an rak nei ve lo. Tuni vekin Birthday Party tla a rak um ve lo. Pathian nih kumkhua nung ding ih a sersiam mi an rak si. Sinan sualnak an tuah hnu in Pathian camsiatnak an tongih kum an nei thawk. Cumi ruangah Adam cu kum 930 tiang a nung.

Adam ihsin Noah tiang ah san 10 (10 generations) a si. Cumi san ah milai pawl cu kum 1000 zik tiang an rak nung. An kum a sau mi zoh in cumi san cu a tusan hnak in boruak (living condition) a rak tha sawn ti hmuh theih a si.

 

4.1. Adam ihsin Noah tiang san 10 (BC 4000 - BC 3000)

 

Adam, Seth, Enosh, Kenan, Mahalaleel,Jared, Enok, Methuselah, Lamek, Noah    

 

4.2. Noah ihsin Abram (Abraham) tiang san 10 (BC 3000 - BC 2000)

 

Noah , Shem, Arphaxad, Shelah, Eber, Peleg, Reu, Nahor, Terah, Abram (Abraham)

 

5. Baibal sungih Moses ngan mi Uk 5

 

Pentateuch tiih kawh mi Seemtirnak ihsin Daan Peksalnak tiang uk 5 hi Moses ih ngan mi a si. (Pentateuch ti cu Greek tong a siih, Penta ti cu 5 tinak, cun Teuchos ticu cazual tinak a si.)

Moses cu BC 1500 ah a suak.

Adam (BC 4000) ihsin san hra nak Noah (BC 3000), Noah ihsin san hra nak Abraham (BC 2000), Abraham fa pa Isak, Isak fa pa Jakob, Jakob fa pa Josef Izipt ramih sal a taan hnu ah Moses cu a suak fang a si. Israel mi pawl Canaan ram pan in nelrawn ih a fehpi lai ah himi cauk uk 5 hi a ngan. A hmuh dah hai lo mi le a theih dah hai lo mi Adam ihsin a suah hlan thuanthu hmuahhmuah famkim zetin a ngan mi zoh in Thlarau Thianghlim ih hmuhsaknak le thawkkhummi ti cu el theih lo a si. BC 4000 ihsin BC 1500 karlak thu pawl cu a kum, a caan le hmin tiang in a ngan khum theh!

 

6. Noah Tilik hnu milai kum (Seemtirnak 6:3)

 

Milai sualnak a karh tuk ruangah Pathian nih leitlun cu tidai thawn a kholh ih minung kum khal kum 1000 ihsin kum 120 ah a tthum. Noah tilik hnu leilungpi cu a siatral nasa ih nikhua khal a hlan vek a si nawn lo. Ei le in khal a har sa tuk thlang ih minung kum cu 120 tlun nun theih ding hrimhrim a si nawn lo. Atu san ah ei-in ziangtluk ttha ih ei hman ah kum 120 leng a nung dam an um thei lo. Pathian nih voi khat a sim ih caan a khiah zo mi cu leitlun minung ih remsal theih a si nawn lo.