Leitlunhluap ih hmin nei zetmi World Council of Churches (WCC) cu mitampi ih uar mi a si vekin kum 1 hnu kum 1 member an pung vivo.

 

WCC Suahkehnak

1910 kum ah Edinburgh, Scotland ah 'World Mission Conference' an rak tuah. Cu mi conference cu Khristian pawl in leitlunhuap mission hna ziangtin kan tuan tlang ding ti relnak a siih kohhran dangdang ihsin an suak khawm hai. Asinan cumi conference ah  liberal pawl leh evangelical pawl ih mission hna an tuan duhdan a bangawk lo. Evangelical khristian pawl cun mission timi cu thlarauhlo kai a si an ti ih liberal pawl cun mission timi cu social hna a si tiah an ti. Himi thu elawknak a um lai ah leitlun raalpi I (1914-1917), leitlun raalpi II (1939-1945) a rak suak.

 

WCC Din Kum

Liberal khristian pawl in 1948 kum ah Amsterdam, Netherland ah 'World Council of Churches (WCC) cu an rak din. Cu mi lai ah kohhran le pawl dangdang in 147 an tel. An tumtahmi cu 'Ecumenical Movement' timi Leilungtlun Khristian Kohhran hmuahhmuah kom-aw ding timi a si. Ecumenical ti cu Greek ttong 'Oikoumene' ih ra mi a siih leitlun pumpi huap tinak a si.

 

WCC cun Johan 17:21 ih Jesuh thlacam "An zatein pakhat an si theinak dingah thla ka cam. Ka Pa, nangmah cu ka sungah na um ih kei khal na sungih ka um vekin annih khal kan sungah um ve hram hai seh. Nangmah in i thlah hi leilung in an zum theinak dingah annih cu pakhat ah cang hram hai seh" ti mi cang sirhsan in kohhran dangdang le pawl dangdang cu hmunkhat ah kan komawk ding tiah an ti.

Evangelical le fundamental Khristian tampi cun WCC dokalh nakah World Evangelical Alliance (WEA) timi cu an din ve a si.

 

Atu ah WCC cu kohhran le pawl 349 ihsin member 560 millions hrawng an si.

WCC tangih um mi kohhran pawl tla cu:

Anglican, Methodist, Baptist, Free Church, Lutheran, Assyrian Orthodox (Antioch Church), Old Catholic, Eastern Orthodox, Oriental Orthodox, Reformed Church, United Church, Pentecostal Church, Presbytarian Church, Independent Church, Mar Thoma (Saint Thomas, India) pawl tla an si. (wcc website sungah kimcangin siar bet a theih)

 

Roman Catholic Church cu WCC member ah an lut lo ziangahtile Roman Catholic cu leilungpar ih kohhran tumbik a si vek in mipum 1 billion hrawng an um. Leitlun Khristian mipum ih a hrek tluk an si. Roman Catholic cu leitlunih kohhran ih tumbik le cakbik an si vekin WCC vek pawlkom tangih um cu an duh ve ce lo. Asinan Roman Catholic cun WCC thawn kut kaiawkin hna an tuan tlang a si. WCC ih thurelcat tu le power neibiktu khal a si.

 

WCC ih Thupom

1. Interfaith Dialogue. Sakhua Biaknak dangdang a simi Buddism, Islam, Hinduism, Confucianism tivek pawl thawn lungrual te ih um tlang.

2. Human Right

3. Social Gospel (mifarah harsa bawm)

4. Green Peace Movement (Pathian sersiammi thil, boruak kilkhawi)

5. Nikhua kilkhawi

6. World Peace (Leitlun daihnakhrang hnatuan)

7. Social hnatuan

8. NGO (mi farah bawm, ngaktahtlawng, sizung tivek tuah)

 

WCC Hruaitupawl ih Cangvaihnak le Zumnak

 

WCC Tawnkhawmnak hi kum 7 lole kum 8 ah voikhat tuah a si.

A voi 10 nak tawnawknak cu Busan, South Korea ah an tuah. South Korea cu evangelical le fundamental zumtu tamnak a si vekin cu pawl cun an ramih WCC Assembly tuah ding cu naza zetin dokalh nak, lamzawhnak an rak nei. Khristian Thuthangca ah khal nasazetin duhlonak an lang ter. September 29, 2009 suah Jusan-ilbu Thuthangca ah an duhlonak san paruk an tarlang. Cu pawl tla cu:

1. WCC cun Biaknak tinkim hmunkhatih umtlang nak (Religious Pluralism) a pom. Khristian Biaknak le a dang biaknak pawl cu a bangawk tiah an pom.

2. WCC ih Bible pom dan le fehpi dan cu Pathian lamin a si lo. Bible cu Pathian ih ngan mi a si lo ruangah a sualmi, a kalh awkmi a um a si an ti.

3. Rundamnak thu ah social lam in an feh. An nih ih rundamnak an timi cu political hremnak ihsin luatnak, sumpai harsatnak ihsin luat nak a si.

4. Sakhua dangdang ih a um mi mangbangza thil tuahnak, healing power cu Pathian pakhat hnen in a ra mi a si an ti.

5. WCC cun mission hnatuan cu thlarau hlo kai siloin an nitin ttulmi bawmnak a si an ti.

6. WCC cu Jesuh hmin in political hnatuannak lam sawn a si.

Cu ruangah WCC cu Christian tiah kan pom thei lo a si tiah an tar lang.

 

- Himi ttum ah president thar pa 8 hrilnak an nei ih, Khristian, Muslim, Hindu, Jewish le Buddhist hrangah tidai a thupitzia an rel tel cih. Cun tikuang pakhat sungah Christian, Muslim, Hindu, Jewish le Buddhist zumnak hruaitupawl in tidai an burh. Sakhua dangdang ah khal tidai cu sual kholhfainak, daihnak hrang a sivekin, leitlun sakhua biaknak tinkim ah daihnak, remnak um ding an tumtah mi a si.

(thechristianpost November 4, 2013)

 

WCC thawn hna tuantlang leitlunhuap ih hminthang zetmi Roman Catholic Pope John Paul II cu 1985 kum August ni 19 ah Casablanca, Morrocco ih Muslim mino 80,000 pawl hnenah hitin thu a sim.

            "Khristian le Muslim pawl cun pathian pakhat kan biak tlang. Cumi pathian cu a ding mi le zangfahnak neimi a si. Khristian le Muslim cun thlacam a thupit zia, rawl-ul, mifarah bawm, sual-sirnak tivek kan zum. Pathian in san cem tikah a zangfahnak thawn thu in tthen leh ding. Thih hnu ih kan thosal tikah cun paradise ah nuamzetin kan leng tlang ding ti kan zum tlang." tiah a ti.

http://www.vatican.va/holy_father/john_paul_ii/speeches/1985/august/documents/hf_jp-ii_spe_19850819_giovani-stadio-casablanca_en.html

 

October 27, 1986 kum ah Pope John Paul II in sakhua dangdang ih hruaitu 100 hrawng cu leitlun daihnak le remnak hrang thla cam tlang ding ah sawmnak a nei. Tibet phungki Dalai Lama khal sawm a si ve ih a Buddha zuklem cu biakttheng hmai ah a ret.

 

January 24, 2002 ah Pope John Paul II in a voihnihnak thlacam tlan nak a sawm sal. Sakhua dangdang a simi Islam, Buddhism, Sikhism, Afican Traditional biaknak, Hinduism, Tenrikyo, Shintoism, Judaism, Zoroastrianism, Janinism le Confucianism tivek ih hruaitu pawl an siih an mah biakmi pathian hnen cio ah leitlun daihnak, remnak hrangah thlacamnak an nei.

http://www.mostholyfamilymonastery.com/JP2apostasywithpagansidolatersandinfidels.php

 

- WCC cun leitlun mi hmuahhmuah cu Pathian hmuihmel kengih sersiam kan si ruangah rualrem te ih um ding a tum tah. Curuangah nu le nu, pa le pa duhawpawl (homosexual) le feminist pawl cu WCC member ah tampi an lut. Sophia timi nu-pathian upat sunlawihnak le nunau le nunau ngaizawngawmi (Lesbian) pawl lawmnak conference cu 1993 kum Novermber ah Minneapolis, Minnesota ah WCC cun a rak bawm. Cumi Conference ah nunau 2,000 lai an tel. 

 

- WCC a voi-7-nak conference cu 1991 kum ah Canberra, Australia ah an tuah. An meeting cu 'a tir ihsin Australia ram hluumtu' 'Aboriginals' pawl  hruainakin an thok.

 

- Cumi conference thotho ah South Korean Presbyterian feminist Chung Hyun-Kyung ih nu-pathian hnenih thlacamnak le aboriginal pawl in lamnak an nei ih Korea nu cun mithi-thlarau pawl kawhnak a nei. Tahtthimnak ah Abraham le Sarah ih hnon rak tongtu Hagar ih thlarau, hlanlai Japan pawl ih rak kaihremmi korea nunaupawl ih thlarau tivek pawl cu a ko. Cun Chung cun hitin a sim, "Hipawl ih au-aw theih loin Tharau Thianghlim ih aw kan thei thei lo ding." a ti. Culawng siloin thli thlarau, leilung thlarau, ti thlarau, thingkung thlarau tivek kawhnak khal a nei. (Religious News Service, March 5, 1991)

 

- WCC ih 'Inter-Faith Dialogue' director a simi Sri Lanka Methodist pastor Wesley Ariarajah cun hitin a sim.

 "Zumnak hmuahhmuah cu a bangawk a si. Pathain in Khristian pawl ih thlacam lawng a ngai ih midang thlacam a ngai lo ti cu zum ding a har a si. Sri Lanka mi Khristian ka si ih Hundu ca khal ka siar vekin pathian in Khristian pawl thawn lawng pehthleihnak a nei ih midang thawn pehthleihnak a nei lo ti cu ka zum thei lo. Silen zonih si Hindu pawl ih thlacam a ngai ding? Pathian tampi a um maw si? Pathian cu pakhat lawng si a um. Khristian kan si ah cun thinlung kaupi kan neih a tul." tiah a ti.

 (The Australian, Feb. 11, 1991).

 

- WCC Khoncil a voi-6-nak cu Vancouver, British Columbia ah July, 1983 ah an tuah ih mi 4,000 lai an tel.

An khawm thoknakah America saklam ih um Idia mi Jesuh zumlotu (pagan) pawl cu thawinak biakttheng an don terih meikhu an muah ter. Cupawlcun biakttheng an donmi parah cun an pathian pawl hnenah thawinak an pekih a kiangah an liam ciamco.

 (Foundation, Vol. IV, Issue III, 1983)

 

- WCC Khoncil ah cun Hindu pa 3, Buddhist pa 4, Jews pa 2, Muslims pa 4 pawl cu sawm an siih an biaknak cio ih ca (scriptures) siarnak an neih ter.

 

- WCC general secretary Philip Potter cun mi hmuahhmuah hitin kawmkhawmawk hi pathian duhzawng a si a ti.

 

-WCC executive committe cun zumnak sakhua dangdang pawl cu kan welcome a si a ti.

 

- WCC moderator Dirk Mulder cun midanghnen thuthangtha kan sim lo ruangih hell an tlak ding ti cu ka zum lo a ti.

 

- WCC 'Foundation Magazine' editor Dr. M.H. Reynols cu Mulder in interview thusuhnak a tuah, "Buddhist le Hindu pawl hi Jesuh Khrih zum loin rundam an si ding na zum maw?" tiah a sut ih hitin a saang, "Ngah tuk e, ngah thuk e." a ti.

 

- 1983 WCC tonawknak ah cun thlanglam India Hindu nu ih Hindu laam classical Bharathanatyam dance' khal an telh.

 (Foundation, Vol. IV, Issue III, 1983)

 

- WCC cun Khrih zumlotu (Non-Christians) pawl cu Pathian ah kan unau an si a ti.

 

- WCC director Sri Lanka Methodist pastor Wesley Ariarajah in 1987 kum Norway ih tuah mi tonkhawmnak ah hitin a sim, "Khristian pawlin zumlotu pawl cu thimnak lakah an um tiih kan ruahnak cu kan hlon a tul. Buddhist pawl khal in Buddha biaknak in rundamnak an co thei ve." a ti.

(The Australian, Feb. 11, 1991, cited in the Reformation Banner, Apr.-Jun. 1991)

 

- WCC evangelism sevretary Raymond Fung cun zozokhal Jesuh an zumlo le khal anmah biaknak sakhua sungin rundam an si ve a ti.

 (Ecumenical Press Service, Dec. 1-5, 1986)

 

- WCC khonsil voi-9-nak cu Porto Alegre, Brazil ah February thla 2006 ah an tuah.

WCC central committee moderator Aram I cun Khristian pawl cun Jesuh Khrih ih hminsinnak le Thlarau Thianghlim umpinak cu a dang sakhua phen ah khal a um a si ti kan theih a tul a ti.  (Institute on Religion and Democracy, Feb. 21, 2006).

 

 

 

Jesuh in, "Keimah cu lamzin le thutak le nunnak ka si. Keimah hnenin siarlo zohman ka Pa hnenah an thleng thei lo." Johan 14:6

 

"Bawi Jesuh zum awla nangmah le nan sungte in rundamnak nan ngah ding," Tirhhlah 16:31

 

"Rundamnak cu amah (Jesuh) ih sung lawngah a um; ziangahtile Pathian ih rundammi kan sinak dingah leikhawvel pumpuluk ah hin minung hnenih pekmi hming dang zohman an um lo."

Tirhthlah 4:12

 

"A zum lotu pawl thawn kom-aw hlah uh. A cang thei lomi a si. Ziangtin so dingnak le siatnak cu an pawl awk thei ding? Ziangtin so tleunak le thimnak cu an umtlang thei ding? 2 Korin 6:14