Tuisan ah Apostle Paul zik vek rori in Jesuh hrang ih hremnak nasazet tongtu Brother Yun (Chinese evangelist) ih Jesuh Khrih hrang a tuarnak 'a Testimony Cauk' cu 2002 kum ah suah a siih leitlun ih zuar tam bikmi lakah a tel.

 

Brother Yun Thuanthu Tawi

 

Brother Yun cu 1958 kum China ram khuate pakhat mifarah innsang ah a rak suak. Kum 16 a kim ah a nu hnen in Jesuh a rak thei. Kum 17 a si in Nitlaknak Ram le Thlanglam Ram hrangah Pathian kawhnak a ngah.
A nu cu 1940s hrawngah Western missionary pawl hnen in Jesuh a rak thei ngah nan Bible siar ding um lo thawn a zumnak a rak dai sal. Nikhat cu a pasal cancer natnak in a thizik tikah a beidong tukih hridai thawn a awk that awk zik lai ah Thlarau Thianghlim ttong aw 'Jesuh in a lo duh' timi a thei. Cumi ihsin a sualsir in hridai cu a phoih sal ih an sungten a pa hrangah thla an cam ih a pa cu a cancer natnak in a dam lan ta.

 

Brother Yun cun Jesuh thu cu a nu hnen ah a sut ih Jesuh cu kan sualnak ruangih thihnak a tuar ih a thosal mi a si. A zirhnak pawl Bible sungah a ngan awk thu le Bible cu a dang khua ih mi pakhat in a neih thu a sim.

Brother Yun cun a dang khua ih Bible neitu hnenah feh in Bible cu a va dil nan a rak hmuh ngam lo ih Pathian hnenah dil awla a lo pek ding tiah a rak sawn.

Cutin ni 100 sung nikhat ah rawl kaan khat lawng ei in Pathian hnenah a dil ih Bible cu rin lo pin midang hmangin a pek.

 

Tlawngkai sang tla a silo tikah harsat phah cingten Bible cu a siarsuak. Cun ni 28 sungah Matthai Cauk cu a by-heart ttheh. Cun Dungthluntu le a dangdang a peh bet. Pathian hnenin Bible a ngahnak thu cu a dang khuami pawlin an theih tikah an hnenih thusim dingah an sawm. Kum 17 lawng a silai vekin thusim tla a thiam lo ih a by-heart mi Matthai cauk cu a thok in a cem tiang a siarsak hai ih mi tampi cu Khrih an cohlang vivo. Kum 17 a ti ah Jesuh Khrih Thuthangtha a phuan nak ruangah kum 4 sung thlawng thlak a rak tuar.

 

Jesuh in thawnginn in a suah sal hnu ah nasa zetin a Thuthangttha phuang tu ah a hmang vivo.

A tawizawngin ngan seh la Jesuh Khrih Thuthangttha a phuannak thawngin mitampi an piangthar, an tthangphawknak ruangah China ram ah voi 3, Burma ramah voi 1 thawng thlak a rak si.

Thawnginn sungah a kumkum in hremnak phunkim a tuar. Thlatang vurtlak laiah a dai zetnak khan vekah an ret. Nitin an thawi, an sit, electric fung vek in an thawi, an pal, an thawi tuk nakah feh thei nawn lo tiangin a ke bai. Security tampi nih suak thei nawnlo dingin an kil cingin Jesuh in security pawl mit cu a phitih a kut an ttemnak a phoih sakih thawnginn gate a ong awkih a suak.

Cuvekin a nunnak ah harsatnak, hremnak tampi a tong vekin Jesuh in mangbangza tampi a tuahnak thu pawl cu 'The Heavenly Man' cauk sung ah a ngan. Himi a nunnak testimony cauk cu leitlun hmun tin ih mitampi nun thlengtu ah Pathian in a hmang.

 

Brother Yun cun hitin a sim.
"Jesuh Khrih cu mizaan, tuni le kumkhua in a bang awk a si."
"Jesus Christ is the same yesterday, today and forever." Hebrews 13:8

Security tampi in ti tthep tthep ih in kil nak thawnginn sangka in ongsak tu Jesuh cu mizaan, tuni le kumkhua in a bang awk. Tuni ih na thawnginn sangka (na harsatnak) cu a lo ongsak thei ve a si.
Thawnginn cu a tak ih ummi a si. Sinan Thutak a simi Jesuh in thawnginn sangka cu in awn sak a si tiah a ti. (Johan 14:6)

Amen!