South Korea cu leitlun ah Technology le Kohhran tthangso (Church Growth) rangbik tiih theih mi ram a si.

Korean Drama le Min-ta, Min-ta-mi pawl cun mi tampi thinlung a luahkhat. Middle East lam tiang in Korean drama an zoh nasa. Japan ram ah tla cu Korea drama ruangih nupa tthenawk tiang a um phah ti a si.

Cun K-pop (Korean pop) cun tulai mino thinlung a luah zet ti cu el theih lo a si.

Sim kau deuh seh la Hollywood le American Music Industry cu 'Satanic Illuminati' kut tang ih um deuh hlir an si. Cu pawl in 2009/2010 ihsin K-pop tamsawn cu an control thok ih Satan sign/ symbol pawl cu an music video le an lamnak (gesture) sign ah an hmang ve nasa zo. Mi uar zet mi Wonder Girls, Girls Generation, Brown Eyed Girls, Big Bang, 2NE1, SHINee le a dangdang tampi khal in Illuminati Satan signs tampi an hmanmi hmuh ding a um.

Cun 'Satanic Back Masking' timi hla dunglam in a thupte ih Satan thangthatnak rak sak mi khal a tampi zo. Mawi duh ruangih plustic surgery tuah biknak ram tiih theih khal a si. Khat le khat zuamawknak a sang vekin thinpit (depression) ruangih mah le mah that-awk (suicide) tambiknak ram lak ah khal a tel. Technology lam ah an tthangso sinsin vekin hnatuan fel, hnatuan rang le zuam zet khal an si. An tthangso rang tuk vekin an thinlung khal a rangih hnatuanpi an har tiih reltu khal an um. 

 

Cun Khristian Biaknak lam ah zoh sehla zirhsualnak ruangih fehsual an tam zet ih, profet deu khal tam zet nak a si. Leitlunhuap ih theih mi Moon Sang Myong vekin pathian ka si a ti awk na, Jesuh ka si a ti awk na khal an um.

 

 Atu caan ih sim le rel ka duh bikmi cu a parlam ih thupawl silo in leitlun ih a danglam zetmi an Khristian nun le an Kohhran nun sawn a si. Cumi lakihsin bulpak ih ka uar mi le Zumtu hrang ih cawntha le zirtha ka timi pawl tla cu:

 

1. PASTOR NUN le BIAKINN

 

(Religion in South Korea - 2005)
Irreligion (46.5%)
Buddhism (22.8%) 
Protestantism (18.3%) 
Catholicism (10.9%) 
Other religions (1.7%)

 

# Korea ram ah Christian zatek hi Catholic thawn kom sehla 30% zik lawng a si. Sinan zozo khal nih pastor cu an tihzah a si.

# Pastor in Kohhran din (Church Planting) an uar zet. Bulpak rori'n zinkap ah thlarauhlo an hawl ih pakhat pahnih te zumtu ah an can cun kohhran pakhat an din cih ngam. Curuangah Korea ram ih Biakinn tamzia cu Kawlram ih pu-ra hnak in a tam sawn ding. Zaan ah cun Biakinn parih Kross sen tete hi siar cawk lo ding khop in hmuh ding a um.

# Yoido Full Gospel Church cu 1958 kum ah Pastor Yong-gi Cho le midang member pa 5 in rak din mi a si. Tu ah cun member million khat (ting 10) hrawng an siih leitlun ih kohhran tumbik ah a cang.

# Member 20,000, 10,000, 5,000 um nak Kohhran a um vek in a tam sawn cu member 500 tang um nak a si. Member pa 2, 3 fang nei kohhran tla an um tho ih pastor cun rintlak zetin Pathian hna an tuan thotho.

# Pastor in Bible siar le thlacam nun an nei. Kohhran pakhat ah a tlangpi in Zarhpi zing, Zarhpi zaan, Nithum zaan le Ninga zaan tiin khawmnak a um ih zingtin zingpit thlacam a um bet.

 

2. ZUMTU/ KHRISTIAN NUN

 

# Zumtu pawl in an pastor hi cozah president tluk in an ttihzah an upat.

# Kohhran hrang ah sumpai/ caan/ thiamnak/ thazang thawn peknak nun an nei. 
Kohhran tthen khat ah cun sibawi le hnatuan sang ti um lo, zovek khal in ek-inn an kholh hluahhlo. 
Zumtu sibawi tthenkhat cun an ram ih um ramdangmi hnatuan pawl cu a lak in an tuamhlawm theu.

# Thlacam nun an nei. Nitin zingpit (5am) thlacam cu thlatang vuur lak khalah pelh lo in an feh thei. Cucu anmah bulpak in Pathian an duhnak ruangah a si.

# Bible siar nun an nei. Smart phone le ipad/ tablet san tiangah train sung le bus sung ah upa, mino tilo in Cauk-Bible rori kengin a siar tu hmuh ding an um lai.

# Thlacam Hmuan (Prayer Mountain) ih rawlul thlacam an uar zet. A tthen khat cu zaanvar in thla an cam. Korea ih um Chin mi pawl tiangin kum thar ah prayer mountain ih thlacam lo cun Pathian thlawsuah co lo ding tlukin a ruat awk.

# Mission thunlung, thlarau hlo hrang ah thinlung an nei ih ramdang ih mission feh an uar zet.

 

3. KHAWMNAK/ Worship Service

 

# Khawm sung ah phone tham, pakhat le pakhat biakawk, camera hmang tivek hmuh ding a um lo. Milem vek rorin caang lo in an to ih sermon an ngai. 
Pathian tihzah zet in an khawm.

# Zarhpini khawm ttheh in Bible Study an nei tlangpi. Bible history le background tiang in zirnak an nei. Cutikah member pawl in Bible thu le thurin an thei kau zet.

# Zarhpini ah Biakinn ih sunvu caan hman an harsat lo. Kohhran tum deuh ah cun nikhat ah service voi 5 hrawng a um. A tthen cu nikhat ah voi 3 khal an khawm ih a laklak ah Bible zirnak le hla zirnak vek an nei bet.

-----------------------------------

Thufim 6:6
Mi zaangzel pawl cun sihte khi va zoh seh,Sihte nuncanzia zoh in zir seh.

Job 12:7-8
Vate le ramsa hman in tampi an lozirh thei ding; Leilung par ramsa le ti sung nga hnen in fimnak dil uh.

■ Zumtu kannih in sihte, vate le ramsa hnen hmanin zir ding kan nei ah cun tuni Korea zumtu pawl an Khristian nun le an Kohhran nun hi keimah bulpak ihsin thokin zirtlak rori a si tiah duhsaknak thawn ka lo hlawm ve hai a si.

 

 

A parih zukpawl hi internet ta a si.
1. Yoido Full Gospel Church
2. Zaan ih Korea Biakinn le Kross Sen 
3. Prayer Mountain ih thlacamnak khan