Kan leilungpi hi nikhat hnu nikhat IT lamah a ṭhangso vivo ih lai khawte berek tiangin cell-phone hman a si thlang. Mi tampi in ṭhanso le inn ṭha lo ṭha neih duh ah a sun a zaan in hna kan ṭuan. Kan thaisun caan le hmailam ih a um lai dingmi thil cu kan ruat man ṭheu lo. Baibal in hmailam thu le caan ziangtin in sim? San cemnak thu hi mitampi ih ruah paihmi a si lem lo. Cun zumdan le pomdan khal a dangdang a um ih kawhhran sungah elawknak le ṭhenṭheknak tiang a suahpi ṭheu. Mi ṭhenkhat cun Jesuh Khrih ratsalding a ni le thla tiang an phuangcia ih cuvekin a rat lo ruangah ningzah mualphonak tawngtu khal an um. Pastor tampi cun himi topic hi sim sual ding an phang ruangah le mipi ih ngai paihmi tla a si lo ruangah an sim lemlo. Bible thiam sang le Commentary ngantu John Calvin le Martin Luther hman in Thuphuan hrilhfiahnak cu an ngan suak lo tin siar loih a um san tu khal an um.

 

Baibal in Jesuh Khrih ih in rundamnak thu le a ratsalnakding thu hi thupi zetah a ret. A voi 1 ratnakding thu hi Thukamhlun ah voi 100 leng a phuang cia. A voi 2 ratsalnakding thu khal Thukamhlun le thar ah voi tampi bung tinten ah voikhat deuhthaw in a phuang cia. Ahleice in Thupuan cabu sungah hmailam ih a cangdingmi fiangten a um. Thuphuan cu Greek tongin (Apocalypse) ti a siih a tican cu (unveiling or revelation) ‘a sin ong in a sungih thuthup phuang ding’ tinak a si. Hi cabu a siartu, a theitu le a thlun tu cu mi thlawsuah an si (Thuphuan 1:3) a ti.

 

Tuni ah Chinmi tampi Western ram ah kan um. Mirang pawl hi Pathian thei hmaisa an sinan tu ahcun an thlarau mit a caw zo. Biakinn tampi ahcun Pathian Thutak, sualnak thu le Hell thu hman sim a ngah nawn lo. Sodom le Gomorah san vekin homosexual, gay le lesbian, feminism, nupa ṭhenawknak, nauthlaak, mahte thatawk tivek le fihnungza sualnakpawl thawn a khat. Hnatuannak hmun le cozah tlawnginn ah Pathian thu rel cu khammi a si zo ih kindergarten hrekkhatah cun sex education hman zirh thok a si zo. Cun, kan leilungpi khal siat lam a pan vivo ih nitin linghnin, raal, paam, natnaksia phunphun le a dangdang thuthang sia lawng theih ding a um. Kan san hi san sia a si zo. Baibal ih a sim mi nikhat hnu nikhat a kim vivo thlang. Hivek san sia ih a ummi kan fale hi Matthai 25 sungih zinan khattein mei-inn a kengmi monu fim vek in mopa Jesuh a hngaktu siding duhsaknak thawn Baibal ih a simmi sancemnak thu a tawibik in thusuhnak le lehnak thawn ka ngan a si.

 

Hmailam ih a um lai dingmi Thu le Caan thusuhnak

 

Leitlun minung Thuanthu hi kum ziangzat a rei zo ih ziangtikah a cem ding?

Leitlun minung thuanthu cu Adam le Evi an tluksiat hnu in a thok ih tuni tiangah kum 6000 a luan zo. Jesuh in leitlun kum 1000 a uk ṭheh in minung thuanthu cu a cem ding.

San cemnak ding sign (hminsinnak) pawl cu ziang a si?
San cemnak ding sign pawl cu Matthai 24 le Thuphuan 6 sungah hitin a sim. Messiah deu pawlin Jesuh hmin in mi tampi an bum ding,  raldonak thawmvang a um ding, paam le linghnin a um ding, zumtu pawl hremnak le thahnak a um ding, profet deu tampi a suak ding, sualnak a karh ding ih duhdawtnak a ṭumsuk ding. Hipawl hi nauhrin nat (Harsatnak) thoknak a si (Mat. 24:8).

 

Thianglawr (Rapture) le Jesuh voi 2 ratsalnak (Second Coming) a bang awk maw?
A bangawk lo. Thianglawr cu Pathian ih a mithiang (piangtharmi) pawl vanih lawrnak a siih Second Coming cu Jesuh le a mithiangpawl leitlun ih ṭumsal nak ding a si.

Thianglawr (Rapture) cu ziang tikah a um ding?

Thianglawr(1 Thes. 4:16-18, 1 Kor. 15:20-23, 1 Kor. 15:51-52)  ziangtikah a um ding ti cu Baibal nih a sim lo. Himi thu ah zumnak (theory) pathum a um. Kum 7 harnak a thok hlan ah a um ding (pre-tribulation), kum 7 harnak a laifang ah a um ding (mid-tribulation) lole kum 7 harnak a cem zawngah a um ding (post-tribulation) tin a si. Mitambik cun kum 7 harnak a thok hlan ah a um ding ti an zum.
 

666 nambat cu ziangtikah a suak ding?
Sahrang tiih kawhmi Antichrist in Israel thawn remdaihnak a tuah dingih kum 3 le hrek sung remdaihnak a um lawk ding. Leitlun mi hmuahhmuah in amah cu an thlun ding. Kum 3 le hrek a cem in Israel mi le zumtu pawl nasazet in hrem a thok ding (Dan. 9:24-17, Mat. 24:21,  Zef 1:15 , Thu. 11:2-3, ). Cun profet deu in sahrang zuklem a tuah dingih a bia lotu pawl cu thah an si ding (Thu. 13:15). Sahrang in mi hmuahhmuah ih vorhlam kutah a si lole an cal ah a hminsinnak nambat 666 a tuah ding. Cumi hminsinnak lo in zianghman zuar thei le lei thei a si lo ding (Thu. 13:16,17). Sahrang hminsinnak nambat nei pawl parah Pathian thinhengnak nasa tak in a thleng ve ding (Thu. 16).

 

Kum 7 harnak sungih a thleng dingmi Pathian thinhengnak cu ziangvek a si?
Kum 7 harnak sungah Tuufa (Jesuh) thinhengnak, zohmanih tuar theilo tuksumza, Tacik pa 7, Tawtawrawt pa 7 le kheng pa 7 hremnak pawl a thleng ding (Thu. 8, 9, 16). Cupawl cu a tanglam vekin a si.

Tacik pa 7 (Thu. 6:1-17, 8:1-5)

 

1. Rang raang: Messiah deu, Antichrist suak (6:1-2,Matt. 24:5).

2. Rang sen: Thahawknak raal ruangah thisen luang (6:3-4, Matt. 24:6-7).

3. Rang dum: pam, mangṭam tlung (6:5-6, Matt. 24:7).

4. Rang ram: raldonak, paamnak le natnak sia in mi ¼ thi (6:7-8, Mat. 24:15,21).

5. Pathian thu sim ruangah thah tong (6:9-11, Matt. 24:9,22).

6. Nasa zetin ling hnin, ni a dum ih thlapi cu thisen bangin sen (6:12-14, 16,17).

 

Tawtawrawt pa 7 (Thu. 8:6-13, 11:15-19)

 

1. Thisen rial le meisa ruah bangin sur (8:7).

2. A alh hluahhlomi meitlang vekin tifinriat 1/3 cu thisen ah cang ter (8:8-9).

3. Meifar bangih alhmi arsi kha tiva le cerhti 1/3 parah tlakih tikha ah cang (8:10-11).

4. Ni 1/3, thlapi 1/3, arsi 1/3 siat theh ih an tleunak a hlo (8:12).

5. Tawpneilo khur sungih suakmi meikhu nih ni tleunak le thli thimter.  Meikhu lak in varngen meipir nei kharbok tampi an suak ih Pathian hminsinnak tacik nei lomi pawl thla 5 sung an hrem (9:1-11).

6. Rang ralkap million 200 in minung 1/3 that (9:12-21).

 

Pathian thinhengnak Kheng 7

 

1. Sahrang tacik neitu parah a na zetmi hmasia suak (16:2).

2. Tifinriat thisen ah cang ih a nungmi thi theh (16:3).

3. Tiva thisen ah cang (16:4-7).

4. Ni in mi kang dingah thu pek (16:8-9).

5. Sahrang uknak khuazakip ah thimkhawzing tlung (16:10-11).

6. Eufrates tivapi a kang ih Armageddon raal do dingah khawmawk (16:12-14).

7. Tuksumza ling hnin, tikulh le tlaang cemral ṭheh, pawng 100 rit mi rial minung parah tlak (16:17-20).

 

 

Armageddon Raal donak cu ziang a si ih zopawl in an do ding?
Armageddon timi cafang hi Hebru ṭong in Har-Magedon ‘Magedon Tlaang’ tinak a siih Jerusalem thlanglam ah a um (2 Siang 23:29, Zek 12:11). Kum 7 harnak a cem zikah sahrang le a dungthluntu pawl cu Israel mi le Jesuh do dingah Magedon timi hmun ah an finkhawm awk theh ding (Thu. 19:11-16). Jesuh cu vancung mero parin cahnak huham le sunlawinak thawn a ra ding (Mat. 24:30). A mithiangpawl in Amah cu an thlun ding ih (Thu. 19:14, 1 Joh. 3:2, Thu. 19:19, Jud 1:14, 1 The. 3:13 )  sahrang le a dungthlun pawl cu an do neh ding (Thu. 17:14, Mal.3:2). Sahrang le profet deu cu kaat mei-alh (The Lake of Fire) ah an nung cingin hlon an si ding. Anmah pahnih hi kaat mei-alh ih a feh hmaisa bik tu an si ding. Tuni ah kaat mei-alh sungah zohman an um hrih lo. Cun Jesuh in a dang ralkap pawl tla a that ṭheh ding (Thu. 19:21).

 

Jesuh cu khuitawk hmun ah a ra sal ding?
Jesuh cu Olive tlaang parin van ah a kai (Tirh. 1:11) ih Olive tlaang thotho ah a ṭum sal ding (Zek. 14:1-4). A voi 2 nak a ratsal tikah cun mi hmuahhmuah ih mithmuh ah cahnak huham le sunlawinak tumpi thawn a ra ding. A rak zum duhlotu Israel mi le a dodaltu pawl in Pathian a si zia kha an thei thlang ding ih miphun zakip an ṭap-ai ding (Mat. 24:30, Tirh. 1:11).

 

Kum 1000 Uknak (Millenial Kingdom) cu ziangtikin a thok ding ih zo pawl an um ding?
Jesuh in Armageddon raal a neh hnu ah (Thu. 19:20) a mithiangpawl thawn leitlun cu kum 1000 sung a uk ding (Thu. 20:1-10). Kum 7 harnak sungin a luatmi zumtupawl khal kum 1000 uknak sungah an lut dingih fa tla tampi an nei sal ding. Himi kum 7 harnak sungin a luatmi pawl cu lei taksa thawn an si hrih ding ruangah an fale cu sual cithlah an si ding ih rundamnak an ṭul ve ding. Jesuh in thir kianghrol (dingnak le thuhman) thawn a uk ding (Sam. 2:9, Thu. 2:27, 12:5, 19:15, Isa. 9:6-7).

 

Satan cu ziangtikah tawpneilo khur ah khum a si ding?
Armegaddon raal donak ah vancungmi pakhat in Satan cu a kai ding ih kum 1000 sung tawpneilo  khur ah a khum ding. Kum 1000 sung cu mi a bum thei nawn lo ding (Thu. 20:1-3).

 

Satan cu ziangtikah kaat meilipi sungah thlak a si ding?
Kum 1000 ṭheh ah Satan cu khur sung in caan tawite sung suah a si ding ih raldo dingah, leilungtlun khuazakip minung bum dingah a feh ding. Anmah cu tifinriat kapih vunnel zat an si dingih Pathian minung pawl umnak hmun le a duh zetmi khawpi kha an kulh ṭheh ding. Asinain van ihsin meisa a tla ding ih ral an do hlan ah a kang that ṭheh hai ding. Cule Satan cu sahrang le profet deu an hlonnak, kaat meilipi sungah hlon a si ding (Thu. 20:7-10).

 

Satan cu a thawngtlaknak in suahsal a si hnu a bum ngah mi pawl cu zo an si?

A rak thi ciami zumtupawl thawhsal an si tikah an ruangpum cu thlengdanglam (glorified body) an si dingih fa an nei nawn lo ding (Mat 22:30).  Kum 7 harnak ihsin a luatmi (survival) zumtu pawl cu an lei taksa thawn kum 1000 uknak sungah an lut ve dingih fate tampi an nei sal ding. Cumi an fale pawl cu sual cithlah an si hrih lai ruangah anmah lakah Jesuh a zum duhlotu an um sal ding. Jesuh amah rori in dingnak, thuhman le duhdawtnak thawn a uk ding nan a zum duhlotu an um ding. Cupawl cu Satan in a bum ngah ding.

Zumlotu mithi pawl atu khawitawkah an um ih ziangtikah an tho sal ding?
Jesuh zumlotu mithi pawl cu mithikhua lole tawpneilo khur tiih kawhmi a sa zetnak khur sungah an um. Himi hmun cu kumkhua hrang a si lo. Mirang Baibal pawl ahcun ‘Hell, Grave, Pit, Abyss, Hades (Luk. 16:23), Sheol (Sem. 37:35, Mip. 16:30-33, Sam. 139:8)’ tin a um. Kum 1000 uknak a cem hnu ah an tho sal ding (Thu. 20:12-13) ih Hell tiih kawhmi kaat mei-alh (the Lake of Fire) sungah thlak an si leh ding (Thu. 20:14-15, 21:8).

Tokham raang Thu ṭhennak cu ziang a si?
Kum 1000 uknak a cem hnuah Jesuh cu thu ṭhen ding in tokham raang parah a to ding. A rak thiciami mithi hmuahhmuah Jesuh hmai ah an ding dingih cabu sungih khum ciami an hnaṭuan vekin an thu a ṭhen sak ding (Thu. 20:11-15). Cuhnu ah profet deu, sahrang le Satan thlaak an sinak kaat mei-alh sungah thlaak an si ve ding.

 

Van thar le Lei thar cu ziangtik ah a um ding?
Hi lei le van cu a hlota ding ih tifinriat khal a um nawn lo ding. Pathian in van thar le lei thar a tuah ding (Thu. 21:1-8). Pathian Amah rori a mithiangpawl thawn a um ding. An mitthli a hnul sak ding, thihnak, ninghan riahsiat, aihram ṭahnak le natnak a um nawn lo ding (Thu. 21:1-7). Satan le sualnak cu kaat mei-alh ah hlon a si zo ruangah sualnak a um nawn lo ding.

Jerusalem Khua Thar cu ziang a si?
“Khawpi Thianghlim Jerusalem thar cu a pasal dingmi tong dingah cei-aw in a timtuah awmi monu vekin Pathian hnen vancung ihsin a rung tum kha ka hmu Thu. 21:2.” tiah Johan in a sim. Cuih Khawpi cu Pathian sunlawinak thawn a tleu. Khawpi lamzin cu sui hlir in tuahmi a si ih thlalang bangin a fai. Pathian le Tuufa ih bawi tokham ihsin thlalang bangin a tleumi nunnak tiva a puut ih, khawpi lamzin laifang in a luang. Cuih tiva kaphnih ah nunnak thingkung a um. Pathian le Tuufa ih bawi tokham cu cuih khawpi ah a um ih a siahhlawh pawl in amah cu hmaiton in an hmu. Bawipa Pathian cu an tleunak a si ding ih kumkhua in a uk lanta ding (Thu. 21,22).