Made in China Thilri

 

▪ Made in China thilri cu leitlun ah a duh kan mal zet ding. 
▪ Cun an Communist cozah tthat lo zia khal theih ttheh a si.
▪ Cuvek thotho in Chinese mi tampi cu tangka aat cilh pawl an siih tthat lo lam khalih hmin thang zet an si.

 

▶Chinese House Church Christian

 

▪ A parih point pawl zoh seh la China ti le cu kan hua zet men tum ttheu.
▪ A sinan China ram Inn Biakinn (House Church) zumtu pawl Jesuh Khrih an zumdan, Jesuh Khrih hrangih an pum pek awkdan, Khrih hrangih thawngtlak le hremnak a phunphun tuar ding an ttih lo dan pawl cu zumtu tampi ih zohtthimtlak rori an si. Tuni ah Thlarau Thianghlim cu meisa vekin an lakah hna a tuan rero.

▪ Tu hlan kum 60 ah Western missionary pawlin China ramah Thuthangtha an rak phur. A sinan 1949 kumah Communist cozah a ding tikah missionary pawl cu an that, an dawi suak thluh, cun zumtu pawl an hrem, thawng an thlak, Biakinn an siat bal thluh, Bible hmuahhmuah an ur kaang thluh a si. Asinan an sung ih thlaici cu an siatbal thei lo ih ni khat hnu ni khat a tthang vivo.

 

▶ China Ramih Inn-Biakinn Zumtu Mipum (atangih youtube link sirhsan in)

 

▪ 1949 kumah China ramah zumtu 800,000 hrawng an um.

▪1949-1980 (kum 30 sung) ah China ram ah zumtu 3,000,000 (3 Millions) an um.

▪ 1980-2014 (kum 30 sung) ah 15,000,000 (150 Millions leng) um ding ah zum a si.

▪ Tu vekin Inn Biakinn zumtu an karh vivo a si le 2030 kum ah cu 300 Millions (Tuni US mipum zat) a kim ding ah an zum.

▪ Chinese House Church zumtu pawl cu Jesuh Khrih dungthlun rori an siih thihngam rori in Thuthangtha an phuang ngam.
Communist cozah tangih an um vekin Biakinn khal sak a ngah loih Inn Biakinn lawng a um. A caan ah cun kaih ttih ah zaan khuathim hnu tivek, lungkua sung vekah an khawm.
Mipa, nunau ti um lo in hrem le thawngthlak an tong. Cucingin Jesuh Khrih an zumnak cu a cak sin.

 

▶ Back to Jerusalem Ministry

 

▪ Thuthangtha cu Jerusalem ihsin a suak thokih Western ram ah a lut. Western ram ihsin tu ah South Korea, cun China tiang a thleng vivo.

▪ Back to Jerusalem ministry ih an vision cu a tu China ram ihsin thlanglam (South) ih Buddhist rampawl Vietnam, Cambodia, Thailand, Myanmar ihsin Hindu ram India, Nepal lam, cun nitlaknak ram (West) lam pan in Islam ram a simi Pakistan, Afghanistan, Iran, Iraq, Arab ram pawl in Jerusalem tiang Thuthangtha kan thlen sal ding timi a si.

▪ 10/40 Window sungih a um mi ram pawl (a tangah zuk a um) hi Jesuh Khrih a Hmin hman theidah lo ( Unreached People Group) pawl um tam bik nak a si.

▪ Tuni ah China ramin Islam ram lam ah missionary tampi an pumpek awk vivo. Hi pawl hin leipar hlawnthil le Biakinn (building) vek saksak siloin Thlarauhlo minung rori hrang sawn ah hna an tuan, Bible vek an zemsuak.

 

▶ Chinese Zumtu pawl hnen in Challenge lak ding ah:

Kan nih Chin ram ah khal Pathian zangfahnak liolio in tuhlan kum 100 ah missionary pawl in Thuthangtha an rak phur. Cumi laiah kan pi, pu pawl cu khuasia hnen ih raithawi men in an rak nung. Zumtu hmaisa bik pawl cu Thuthangtha ruangah hremnak phunphun an rak tuar. Cumi an thlaici tuh mi in tuni Chinram cu Khristian ram ih kan can mi hi santhar zumtu pawl in kan hngilh ding phan a um zet. Tusan ah cun Khrih dung thlun ding hnakin Zumtu ti awk cingin mah hminthannak, lennak le nuamnak hrang lawng ah a nung kan tam vivo.

Chinese zumtu pawl vekin Hindu ramlam le Islam ramlam ah missionary kan va tuan thei lo hman ah kan kiangnai bikih ummi Kawlpawl hnen talih Thuthangtha phuan ding hi Pathian nih in pek mi tuanvo rori a si.

Cuvek thotho in ramdang ah khal a um kan tam vivo thlang ih kan kiangkap ah Sakhua dangdang biaktu tla an um. Mah le ti thei tawk in kan ken mi Thuthangtha cu miphun dang, sakhua dang biaktu pawl hnenah phuang suak vivo nak thawn A ram hrang ttuan cio vivo sehla tiah challenge ka ngah mi te ka lo hlawm ve hai.

Matthai 24:14
Cun miphun hmuahhmuah ih theih ṭheh dingah hi vancung Uknak Thuthang ṭha hi leilung tlun khuazakip ah phuan a si ding. Cuih hnuah a netnak cu a si ding.

Matthai 16: 24
Cun Jesuh in a dungthluntu pawl hnenah, “Zokhal keimah thlun a duhtu cu amah ih duhnak kha taan in a thinglamtah phur in i thlun seh."